Перитонитнинг тарқалганлиги ва давомийлигига боғлиқ клиник-морфологик таҳлили

Аннотация

Мақсад. Перитонит билан оғриган беморларда қўлланилган даво тактикаси, даво усули, операцияга
кўрсатмалар, унинг тури, ҳажми ҳамда уларда қорин парданинг морфологик тавсифини таҳлил қилиш.
Материал ва усуллар. Тадқиқотлар 2021 йил давомида И. Иргашев номидаги Тошкент шаҳар 4-сон клиник шифохонасининг хирургия бўлимида даволанган 1878 нафар беморларда ўтказилди. Тадқиқотда
клиник, инструментал, биопсион морфологик текширув, жарроҳлик ва консерватив даволаш ҳамда
статистик таҳлил усулларидан фойдаланилиб, олинган натижалар солиштирилган.
Натижалар. Беморларда перитонит билан асоратланишга: ўткир аппендицит – 44%; меъда ва 12
бармоқли ичак тешилган яраси – 26%; панкреонекроз – 6%; қорин бўшлиғи ва қорин парда орти
бўшлиғи аъзолари шикастланиши – 9,6%; ЎТК (ўткир флегманоз-тошли холецистит, холедохолитиаз, ўт пуфаги эмпиемаси) – 6,4%; сиқилган чурра (чов, сон, операциядан кейинги) – 3,2%; ўткир ичак
тутилиши (битишмали, ичак буралиши) – 1,6%; меъда ости бези ўсмаси – 1,6%; тутқич томирлари
тромбози – 1,6% ҳолларда сабаб бўлгани аниқланди. Ўтказилган клиник ва морфологик натижалар
интерпретацияси даволаш усулини тўғри танлаш ва асосли патогенетик ёндашув учун имкон яратади.
Хулоса. Перитонитнинг клиник кечиши, яллиғланиш жараёнининг давомийлиги ва тарқалганлиги
ҳамда унга мос равишда қорин парда морфологик тузилмаларининг реакциясини инобатга олган ҳолда
хирургик аралашув услуби ва ҳажмини танлаш даволаш самарадорлигининг ортишига олиб келади.